கனடாவின் ரொறன்ரோவிலுள்ள அடுக்குமாடி குடியிருப்பு ஒன்றின் பொது நடைபாதைக்குள் புகுந்து, முகம் தெரியாத நபர் ஒருவரைத் தாக்கிப் படுகாயப்படுத்திய மற்றும் கொள்ளையிட்ட குற்றச்சாட்டின் கீழ், தலைமறைவாக உள்ள 33 வயதுடைய சந்தேகநபர் ஒருவரை ரொறன்ரோ பொலிஸார் (Toronto Police Service) தீவிரமாகத் தேடி வருகின்றனர்.

கடந்த மே 23ஆம் திகதி, ரொறன்ரோவின் ‘லாரன்ஸ் அவென்யூ ஈஸ்ட்’ (Lawrence Avenue East) மற்றும் ‘கிங்ஸ்டன் வீதி’ (Kingston Road) சந்திப்பிற்கு அருகில் அமைந்துள்ள அடுக்குமாடி குடியிருப்பு வளாகத்தில் தாக்குதல் சம்பவம் ஒன்று இடம்பெறுவதாகக் கிடைத்த அவசர முறைப்பாட்டிற்கு அமைவாகவே பொலிஸார் அங்கு விரைந்திருந்தனர்.

குறிப்பிட்ட அடுக்குமாடி குடியிருப்பின் நடைபாதையில் நின்றுகொண்டிருந்த நபர் ஒருவரை நோக்கிச் சென்ற சந்தேகநபர், அவருடன் வீண் வாக்குவாதத்தில் (Verbal altercation) ஈடுபட்டுள்ளார் எனப் பொலிஸ் புலனாய்வாளர்கள் தெரிவித்துள்ளனர். இவ் வாக்குவாதம் முற்றிய நிலையில், சந்தேகநபர் பாதிக்கப்பட்ட நபரை நிலத்தில் தள்ளி முகத்திலும் உடலிலும் தொடர்ச்சியாகக் குத்தியும், உதைத்தும் கொடூரமான முறையில் தாக்கியுள்ளார்.

இத் திட்டமிடப்படாத கொடூரத் தாக்குதலில் சிக்கிய நபர், பலத்த காயங்களுக்கு உள்ளான நிலையில் மீட்கப்பட்டு அவசர சிகிச்சைக்காக வைத்தியசாலையில் அனுமதிக்கப்பட்டுள்ளார். அவருக்குப் பாரிய படுகாயங்கள் (Serious injuries) ஏற்பட்டுள்ள போதிலும், அவை உயிருக்கு ஆபத்தானவை அல்ல (Non-life-threatening) என மருத்துவப் பிரிவினர் உறுதிப்படுத்தியுள்ளனர். அத்துடன், பாதிக்கப்பட்ட நபருக்கும் சந்தேகநபருக்கும் இடையே முன்னரே எவ்விதப் பழக்கமும் அல்லது பகையோ இருக்கவில்லை எனவும் பொலிஸார் குறிப்பிட்டுள்ளனர்.

இச் சம்பவத்துடன் தொடர்புடைய சந்தேகநபர் 33 வயதுடைய ஓமர் அத்தியா (Omar Attia) எனப் பொலிஸாரால் உத்தியோகபூர்வமாக அடையாளம் காணப்பட்டுள்ளார். நிரந்தர முகவரி எதுவும் இல்லாத (Of no fixed address) இவருக்கு எதிராகப் பின்வரும் கடுமையான குற்றச்சாட்டுகளின் கீழ் திறந்த பிடியாணை (Warrant) பிறப்பிக்கப்பட்டுள்ளது:

• கடுமையான உடல் உவாதிகளை ஏற்படுத்துதல் / படுகாயப்படுத்துதல் (Aggravated assault)

• கொள்ளையிடுதல் (Robbery)

• நீதிமன்ற நன்னடத்தை உத்தரவை மீறுதல் (Fail to comply with probation order)

தலைமறைவாக உள்ள சந்தேகநபர் ஓமர் அத்தியா தற்போது எங்கு மறைந்துள்ளார் என்பது குறித்த விபரங்கள் எவையேனும் தெரிந்திருப்பின், அல்லது இவரைப் பொது இடங்களில் அவதானிப்பவர்கள் யாராவது இருப்பின், அவர்கள் உடனடியாக ரொறன்ரோ பொலிஸாரைத் தொடர்பு கொண்டு விபரங்களை வழங்குமாறு அவசரமாகக் கேட்டுக்கொள்ளப்பட்டுள்ளனர்.