கனடாவின் ஒரிலியா (Orillia) நகரில் கடந்த வார இறுதியில் யூதர்களுக்கு எதிரான வெறுப்புணர்வைத் தூண்டும் வகையிலான (Antisemitic) பிரசுரங்கள் மற்றும் பொருட்கள் விநியோகிக்கப்பட்டமை தொடர்பாக ஒன்ராறியோ மாகாணப் பொலிஸார் (OPP) தீவிர விசாரணைகளை ஆரம்பித்துள்ளனர்.
கடந்த ஞாயிற்றுக்கிழமை ஒரிலியா நகரெங்கும் இவ்வாறான வெறுப்புணர்வைத் தூண்டும் பொருட்கள் விநியோகிக்கப்பட்டுள்ளதாகக் கிடைத்த உத்தியோகபூர்வ முறைப்பாடுகளையடுத்தே, ஒன்ராறியோ மாகாணப் பொலிஸ் பிரிவின் (Orillia OPP) ‘வெறுப்புணர்வு/தீவிரவாதம் மற்றும் பாரிய குற்றப் புலனாய்வுப் பிரிவினர்’ (Hate/Extremism and Major Crime units) இணைந்து இந்த விசேட விசாரணைகளை முடுக்கிவிட்டுள்ளனர்.
இது குறித்து மாகாணப் பொலிஸார் வெளியிட்டுள்ள ஊடக அறிக்கையில்:
“வெறுப்புணர்வை அடிப்படையாகக் கொண்ட குற்றங்கள் மற்றும் சம்பவங்கள் தொடர்பான அனைத்துப் பதிவுகளையும் ஒன்ராறியோ மாகாணப் பொலிஸார் மிகவும் தீவிரமாகக் கையாண்டு வருகின்றனர். இனம், மதம், பூர்வீகம், பாலியல் நோக்குநிலை அல்லது பாலின அடையாளம் ஆகியவற்றின் அடிப்படையில் தனிநபர்களையோ அல்லது ஒரு குறிப்பிட்ட சமூகத்தையோ இலக்கு வைத்து நடத்தப்படும் இத்தகைய வெறுப்புணர்வுச் செயல்களுக்கு எமது சமூகத்தில் இடமில்லை என்பதுடன், அவை ஒருபோதும் பொறுத்துக்கொள்ளப்பட மாட்டாது” எனத் தெரிவிக்கப்பட்டுள்ளது.
இச் சம்பவத்துடன் தொடர்புடைய சந்தேகநபரைக் கண்டறிவதற்காக, ஒரிலியா நகரில் வசிக்கும் பொதுமக்கள் அனைவரும் தங்களது வீடுகள் மற்றும் வணிக நிறுவனங்களின் பாதுகாப்பு கேமரா (CCTV) பதிவுகளைப் பரிசோதிக்குமாறு பொலிஸார் அவசரமாகக் கோரியுள்ளனர். குறிப்பாக, கடந்த சனிக்கிழமை மாலை முதல் ஞாயிற்றுக்கிழமை நண்பகல் வரையான காலப்பகுதிக்குள் ஏதேனும் சந்தேகத்திற்கிடமான நடமாட்டங்கள் பதிவாகியிருப்பின், அக் காட்சிகளைப் பொலிஸாரிடம் ஒப்படைக்குமாறு கேட்டுக்கொள்ளப்பட்டுள்ளனர்.
அத்துடன், யூத எதிர்ப்பு வெறுப்புணர்வுப் பொருட்கள் அடங்கிய இத்தகைய பாக்கெட்டுகள் அல்லது பிரசுரங்களை நேரடியாகப் பெற்றுக்கொண்ட பொதுமக்கள் எவரேனும் இருப்பின், அவர்களையும் உடனடியாகப் புலனாய்வாளர்களைத் தொடர்புகொள்ளுமாறு பொலிஸார் வலியுறுத்தியுள்ளனர்.
இவ்வாறான சம்பவங்கள் குறித்துப் பொதுமக்கள் அச்சமின்றிப் பொலிஸாருக்குத் தகவல் வழங்குவது, குற்றவாளிகளுக்கு எதிராகத் தகுந்த சட்ட நடவடிக்கை எடுப்பதற்கும், ஒன்ராறியோ மாகாண மக்களின் உரிமைகள் மற்றும் கண்ணியத்தைப் பாதுகாப்பதற்கும் வழிவகுக்கும் எனப் பொலிஸ் அறிக்கை மேலும் குறிப்பிடுகின்றது.
இவ் விவகாரம் தொடர்பாகத் தகவல்களை அறிந்த சாட்சிகள் அல்லது பொதுமக்கள் எவரேனும் இருப்பின், அவர்கள் 1-888-310-1122 என்ற இலக்கத்தின் ஊடாக ஒன்ராறியோ மாகாணப் பொலிஸாரைத் தொடர்பு கொள்ள முடியும் அல்லது ‘க்ரைம் ஸ்டாப்பர்ஸ்’ (Crime Stoppers) அமைப்பின் ஊடாகத் தங்களது அடையாளங்களை வெளிப்படுத்தாமல் அநாமதேயமாகவும் (Anonymously) தகவல்களை வழங்க முடியும் என அறிவிக்கப்பட்டுள்ளது
