சிவகார்த்திகேயனின் ‘பிரின்ஸ்’, பிரதீப் ரங்கநாதனின் ‘லவ் டுடே’ ஆகிய படங்களில் நடித்து ரசிகர்களின் கவனத்தை கவர்ந்த யூட்யூப் ஸ்டார் ‘ஃபைனலி’ பாரத் பெயரிடப்படாத திரைப்படத்தின் மூலம் கதையின் நாயகனாக அறிமுகமாகிறார். இதற்கான அதிகாரப்பூர்வமான அறிவிப்பு வெளியாகி இருக்கிறது.
அறிமுக இயக்குநர் ஹரிஹரசுதன் இயக்கத்தில் உருவாகும் பெயரிடப்படாத புதிய திரைப்படத்தில் ‘ஃபைனலி’ பாரத், ஷான்வி மேக்னா, பால சரவணன் உள்ளிட்ட பலர் நடிக்கிறார்கள். இந்த திரைப்படத்தை ‘மாவீரன்’, ‘3 BHK’ ஆகிய படங்களை தயாரித்த சாந்தி டாக்கீஸ் நிறுவனம் சார்பில் தயாரிப்பாளர் அருண் விஷ்வா தயாரிக்கிறார். இப்படத்தில் பணியாற்றும் நடிகர்கள், நடிகைகள் மற்றும் தொழில்நுட்ப கலைஞர்கள் குறித்த அதிகாரப்பூர்வமான அறிவிப்பு விரைவில் வெளியாகும் என எதிர்பார்க்கப்படுகிறது.
இக்கால இளைய தலைமுறையினரை கவரும் வகையிலும், ஃபீல் குட் ஃபேமிலி என்டர்டெய்னராகவும் இப்படம் தயாராகிறது என படக் குழுவினர் தெரிவித்துள்ளனர் என்பது குறிப்பிடத்தக்கது.