மேற்கிந்தியத் தீவுகளுக்கெதிரான மூன்றாவது இருபதுக்கு – 20 சர்வதேசப் போட்டியில் நியூசிலாந்து வென்றது.
ஐந்து போட்டிகள் கொண்ட இத்தொடரின் முதலாவது போட்டியை மேற்கிந்தியத் தீவுகளும், இரண்டாவது போட்டியை நியூசிலாந்தும் வென்றிருந்த நிலையில் நெல்சனில் ஞாயிற்றுக்கிழமை (09) நடைபெற்ற நாணயச் சுழற்சியில் வென்ற நியூசிலாந்தின் அணித்தலைவர் மிற்செல் சான்ட்னெர், தமதணி முதலில் துடுப்பெடுத்தாடுமென அறிவித்தார்.
அந்தவகையில் முதலில் துடுப்பெடுத்தாடிய நியூசிலாந்து, டெவொன் கொன்வேயின் 56 (34), டரைல் மிற்செல்லின் 41 (24), றஷின் றவீந்திரவின் 26 (15) ஓட்டங்களோடு 20 ஓவர்களில் 9 விக்கெட்டுகளை இழந்து 177 ஓட்டங்களைப் பெற்றது. பந்துவீச்சில் மத்தியூ போர்டே 4-0-20-2, ஜேசன் ஹோல்டர் 4-0-31-2, றொமாரியோ ஷெப்பர்ட் 3-0-23-1, ஷாமர் ஸ்பிறிங்கர் 4-0-36-1 என்ற பெறுதிகளைப் பெற்றிருந்தனர்.
பதிலுக்கு 178 ஓட்டங்களை வெற்றியிலக்காகக் கொண்டு துடுப்பெடுத்தாடிய மேற்கிந்தியத் தீவுகள், ஷெப்பர்ட்டின் 49 (34), ஸ்பிறிங்கரின் 39 (20) ஓட்டங்களோடு போராடியபோதும் ஜேக்கப் டஃபி (3), இஷ் சோதி (3), மிஷெல் பிறேஸ்வெல், சான்ட்னெர், கைல் ஜேமிஸனிடம் விக்கெட்டுகளைப் பறிகொடுத்து 19.5 ஓவர்களில் சகல விக்கெட்டுகளையும் இழந்து 168 ஓட்டங்களையே பெற்று 9 ஓட்டங்களால் தோல்வியடைந்தது.
