ஆப்கானிஸ்தான் மற்றும் பாகிஸ்தான் எல்லைகளுக்கு இடையே கடந்த மூன்று வாரங்களாக நீடித்து வரும் மோதல், தற்போது பெரும் மனிதநேயப் பேரழிவாக மாறியுள்ளது. காபூலில் உள்ள போதைப்பொருள் ஒழிப்பு சிகிச்சை மருத்துவமனை (Omar Addiction Treatment Hospital) மீது பாகிஸ்தான் நடத்திய வான்வழித் தாக்குதலில் 400 பேர் கொல்லப்பட்டதாக தலிபான் அரசு குற்றம் சாட்டியுள்ளது.
காபூல் நேரப்படி திங்கட்கிழமை இரவு 9:00 மணியளவில் இத்தாக்குதல் நடத்தப்பட்டுள்ளது. 2,000 படுக்கை வசதிகளைக் கொண்ட இந்த மருத்துவமனையின் பெரும் பகுதி தரைமட்டமாக்கப்பட்டுள்ளதாக ஆப்கானிஸ்தான் துணை ஊடகப்பேச்சாளர் ஹம்துல்லா ஃபித்ரத் தெரிவித்துள்ளார். இச்சம்பவத்தில் 400 பேர் உயிரிழந்துள்ளதோடு, 250-க்கும் மேற்பட்டோர் காயமடைந்துள்ளனர். உயிரிழந்தவர்கள் அனைவரும் பொதுமக்கள் எனத் தெரிவிக்கப்பட்டுள்ளது.
பாகிஸ்தான் மீண்டும் ஒருமுறை ஆப்கானிய வான்பரப்பை மீறி, மனிதநேயத்திற்கு எதிரான போர்க்குற்றத்தைப் புரிந்துள்ளதாக தலிபான் பேச்சாளர் ஜபிஹுல்லா முஜாஹித் கண்டனம் தெரிவித்துள்ளார்.
இந்தக் குற்றச்சாட்டுகளை பாகிஸ்தான் முற்றாக மறுத்துள்ளது. காபூல் மற்றும் நங்கஹார் பகுதிகளில் உள்ள தலிபான் இராணுவ நிலைகள் மற்றும் ஆயுதக் கிடங்குகளை மட்டுமே தாம் இலக்கு வைத்ததாக பாகிஸ்தான் தகவல் அமைச்சு தெரிவித்துள்ளது. பொதுமக்கள் எவருக்கும் பாதிப்பு ஏற்படவில்லை என்றும், தலிபான்கள் பொதுமக்களின் உணர்வைத் தூண்டிவிட முற்படுவதாகவும் பாகிஸ்தான் கூறியுள்ளது.
பாகிஸ்தானுக்குள் தாக்குதல் நடத்தும் தீவிரவாதக் குழுக்களுக்கு ஆப்கானிஸ்தான் புகலிடம் அளிப்பதாக பாகிஸ்தான் குற்றம் சாட்டுகிறது. அதேவேளை, தனது இறையாண்மையை பாகிஸ்தான் மீறுவதாக ஆப்கானிஸ்தான் கூறுகிறது. கடந்த சில வாரங்களாக இரு நாட்டு எல்லைகளிலும் நீடித்து வரும் மோதல்களில் இதுவரை நூற்றுக்கணக்கான வீரர்கள் மற்றும் பொதுமக்கள் கொல்லப்பட்டுள்ளனர்.
ஐக்கிய நாடுகள் பாதுகாப்புச் சபை, பயங்கரவாதத்தை ஒழிக்க ஆப்கானிஸ்தான் உடனடி நடவடிக்கை எடுக்க வேண்டும் என வலியுறுத்தியுள்ளது. சீனா போன்ற நாடுகள் போர்நிறுத்தத்திற்கு முயன்ற போதிலும், தெற்காசிய அரசியல் ஆய்வாளர்களின் கருத்துப்படி, இந்த மோதல் விரைவில் முடிவுக்கு வரும் அறிகுறிகள் தென்படவில்லை. இதற்கிடையில், போரினால் இடம்பெயர்ந்த 20,000 குடும்பங்களுக்கு உலக உணவுத் திட்டம் (WFP) அவசர உதவிகளை வழங்கத் தொடங்கியுள்ளது.
