கச்சதீவு புனித அந்தோனியார் ஆலய வருடாந்த உற்சவத்துக்குச் சென்ற இலங்கைப் படகு ஒன்றில், ‘தமிழக வெற்றிக் கழகத்தின்’ கொடி பறக்கவிடப்பட்டிருந்தமை அங்கு கூடியிருந்த இந்திய யாத்திரிகர்களிடையே பெரும் ஆர்வத்தை ஏற்படுத்தியது.
ஆலயத்தின் வருடாந்தத் திருவிழா நேற்று கோலாகலமாக ஆரம்பமானது.
இந்த உற்சவத்தில் கலந்துகொள்வதற்காக இந்தியா மற்றும் இலங்கையிலிருந்து சுமார் 12 ஆயிரத்துக்கும் மேற்பட்ட பக்தர்கள் கச்சதீவில் திரண்டுள்ளனர்.
இதன்போது, இலங்கையிலிருந்து சிறிய படகு ஒன்றில் கச்சதீவுக்குப் பயணித்த சில இளைஞர்கள், நடிகர் விஜய்யின் தலைமையிலான ‘தமிழக வெற்றிக் கழகத்தின்’ கொடியை ஏந்தியவாறு பயணித்தனர்.
இலங்கைப் படகில் தமிழக அரசியல் கட்சி ஒன்றின் கொடி பறப்பதைக் கண்ட அங்கிருந்த இந்திய யாத்திரிகர்கள் மற்றும் ஏனைய பக்தர்கள், அதனை மிகுந்த வியப்புடனும் ஆர்வத்துடனும் அவதானித்தனர்.
