இயக்குநர் அபிஷன் ஜீவிந்த் நடிகர் அவதாரம் எடுத்திருக்கும் வித் லவ் படம் பார்த்துக் கொண்டிருப்பவர்கள் அது குறித்து சமூக வலைதளங்களில் என்ன பதிவு செய்து கொண்டிருக்கிறார்கள் என்று பார்க்கலாம்.
இயக்குநர், ஹீரோ: சசிகுமார், சிம்ரன் உள்ளிட்டோர் நடித்த டூரிஸ்ட் ஃபேமிலி படம் மூலம் கோலிவுட்டுக்கு கிடைத்த இயக்குநர் அபிஷன் ஜீவிந்த். சின்ன பையனாக இருந்து கொண்டு என்ன அழகாக படம் எடுத்திருக்கிறார் என்று அவரை பாராட்டாதவர்களே இல்லை. திரையுலக பிரபலங்கள் எல்லாம் அபிஷன் ஜீவிந்தை நேரில் அழைத்து பாராட்டினார்கள்.
டூரிஸ்ட் ஃபேமிலியை அடுத்து அபிஷன் என்ன செய்யப் போகிறார் என்று அனைவரும் காத்திருந்த நிலையில் யாரும் எதிர்பாராவிதமாக ஹீரோவாகிவிட்டார் .
வித் லவ் படம் மூலம் கோலிவுட்டில் ஹீரோயினாக அறிமுகமாகியிருக்கிறார் அனஸ்வரா ராஜன். புதுமுகங்களாக சேர்ந்து உருவாக்கியிருக்கும் வித் லவ் படத்தை தயாரித்திருக்கிறார் சவுந்தர்யா ரஜினிகாந்த். அந்த படம் சென்சார் போர்டுக்கு சென்று சான்று பெற்று ரிலீஸாகியிருக்கிறது.
வித் லவ் படத்தை பார்ப்பவர்கள் எக்ஸ் தளத்தில் கூறியிருப்பதாவது, ஹீரோ, ஹீரோயின், இயக்குநர் கூட்டணி புதிதாக மட்டும் அல்ல நன்றாகவும் இருக்கிறது. அபிஷன் ஜீவிந்த், அனஸ்வரா ராஜன் இடையேயான கெமிஸ்ட்ரி நன்றாக உள்ளது. பள்ளி காலத்துக்கு நம்மை அழைத்துச் செல்கிறது படம். முதல் படம் என்று சொல்ல முடியாத அளவுக்கு சிறப்பாக நடித்திருக்கிறார் அபிஷன் ஜீவிந்த். இயக்குநராச்சே அதனால் அவர் நன்றாக நடித்திருப்பதை பார்த்து ஆச்சரியம் இல்லை. அனஸ்வரா ராஜன் அழகாக இருக்கிறார், க்யூட்டாக நடிக்கவும் செய்திருக்கிறார்.
முதல் பாதியை விட இரண்டாம் பாதி நன்றாக இருக்கிறது. ஷான் ரோல்டனின் இசை ரசிக்கும்படி இருக்கிறது. புதுமுக இயக்குநர் மதன் தனக்கு கிடைத்த வாய்ப்பை சரியாக பயன்படுத்தியிருக்கிறார். சும்மா ஜாலியாக, ரிலாக்ஸாக ஒரு காதல் படம் பார்க்கணும் என்றால் வித் லவ் படம் பார்க்கலாம். கதை புதிது இல்லை என்றாலும் அதை நம்மை ரசிக்கும்படி கொடுத்திருக்கிறார் இயக்குநர். பள்ளிக் காட்சிகள் அதிகம் கவர்கிறது. தியேட்டரில் இருந்து வெளியே வரும்போது முகத்தில் சிரிப்பு இருக்கிறது. 96 படம் மற்றும் பிரேமலுவை கலந்து கொடுத்தது போன்று உள்ளது. செம ஃபன். மனம் விட்டு சிரிக்க வைக்கிறது படம் என்று தெரிவித்துள்ளனர்.
