ஐக்கிய அரபு இராச்சியத்தில் நடைபெற்றுவரும் இன்டர்நெஷனல் லீக் ரி20 கிரிக்கெட் போட்டியில் கல்வ் ஜயன்ட்ஸ் அணிக்காக விளையாடிவரும் பெத்தும் நிஸ்ஸன்க மூன்றாவது தொடர்ச்சியான அரைச் சதம் குவித்து வரலாறு படைத்துள்ளார்.
டெசர்ட் வைப்பர்ஸ் அணிக்கு எதிராக துபாய் சர்வதேச கிரிக்கெட் விளையாட்டரங்கில் நேற்று இரவு நடைபெற்ற போட்டியில் அவர் அரைச் சதம் குவித்த போதிலும் சுப்பர் ஓவர் முடிவினால் அது வீண் போனது.
எம்ஐ எமிரேட்ஸ் அணிக்கு எதிரான போட்டியில் 81 ஓட்டங்களையும் துபாய் கெப்பிட்டல்ஸ் அணிக்கு எதிரான போட்டியில் 67 ஓட்டங்களையும் பெற்று இரண்டு போட்டிகளிலும் கல்வ் ஜயன்ட்ஸ் அணியை வெற்றிபெறச் செய்து ஆட்ட நாயகன் விருதுகளை வென்றிருந்தார்.
தொடர்ந்து நேற்று நடைபெற்ற போட்டியில் தொடர்ச்சியான 3ஆவது அரைச் சதத்தைக் குவித்த இன்டர்நெஷனல் லீக் ரி20 கிரிக்கெட்டில் அபூர்வ சாதனை ஒன்றை நிலைநாட்டினார்.
எவ்வாறாயினும், சமநிலையில் முடிவடைந்த அப் போட்டியில் அவரது அணி சுப்பர் ஓவரில் தோல்வி அடைந்தது.
அப் போட்டியில் முதலில் துடுப்பெடுத்தாடிய கல்வ் ஜயன்ட்ஸ் 20 ஓவர்களில் 5 விக்கெட்களை இழந்து 179 ஓட்டங்களைப் பெற்றது.
பெத்தும் நிஸ்ஸன்க 29 பந்துகளில் 4 பவுண்டறிகள், 4 சிக்ஸ்கள் உட்பட 56 ஓட்டங்களைப் பெற்றார். ரஹ்மானுல்லா குர்பாஸ் 41 ஓட்டங்களையும் ஜேம்ஸ் வின்ஸ் 25 ஓட்டங்களையும் பெற்றனர்.
பந்துவீச்சில் குசய்மா தன்வீர் 23 ஓட்டங்களுக்கு 2 விக்கெட்களையும் நூர் அஹ்மத் 47 ஓட்டங்களுக்கு 2 விக்கெட்களையும் கைப்பற்றினர்.
பதிலுக்கு துடுப்பெடுத்தாடிய டெசர்ட் வைப்பர்ஸ் அணி 20 ஓவர்களில் 9 விக்கெட்களை இழந்து 179 ஓட்டங்களைப் பெற்று போட்டியை சமநிலையில் முடித்தது.
டேன் லோரன்ஸ் 56 ஓட்டங்களையும் அணித் தலைவர் சாம் கரன் 44 ஓட்டங்களையும் பெற்றனர்.
பந்துவீச்சில் அஸ்மத்துல்லா ஓமர்ஸாய் 32 ஓட்டங்களுக்கு 4 விக்கெட்களையும் நுவன் துஷார 33 ஓட்டங்களுக்கு 2 விக்கெட்களையும் கைப்பற்றினர்.
இதனை அடுத்து வெற்றி அணியைத் தீர்மானிக்க சுப்பர் ஓவர் அமுல்படுத்தப்பட்டது.
நுவன் துஷாரவின் சுப்பர் ஓவரில் டெசர்ட் வைப்பர்ஸ் ஒரு விக்கெட்டை இழந்து 13 ஓட்டங்களைப் பெற்றது.
டேன் லோரன்ஸ் 10 ஓட்டங்களைப் பெற்றார்.
நசீம் ஷாவின் சுப்பர் ஓவரில் கல்வ் ஜயன்ட்ஸ் 9 ஓட்டங்களை மாத்திரம் பெற்று தோல்வி அடைந்தது.
ஆட்டநாயகன்: டேன் லோரன்ஸ்
