கடந்த ஆகஸ்ட் மாதம் டொமினிக் அருண் என்பவரது இயக்கத்தில் கல்யாணி பிரியதர்ஷன் நடிப்பில் திரையரங்குகளில் வெளியானது ‘லோகா சாப்டர் 1: சந்திரா’. இப்படத்தின் ஓடிடி ரிலீசுக்காக பெரும் எதிர்பார்ப்புடன் காத்திருப்பில் இருந்தனர் ரசிகர்கள். இந்நிலையில் தற்போது ‘லோகா’ ஓடிடியில் வெளியிடப்பட்டுள்ளது. இந்த வாரம் ரசிகர்கள் எதிர்பார்த்த அசத்தலான படங்கள் ஓடிடியில் ரிலீஸ் செய்யப்பட்டுள்ளது. இது சம்பந்தமான முழுமையான விவரங்களை தற்போது பார்க்கலாம்.
கடந்த அக்டோபர் 2 ஆம் தேதி தனுஷ் இயக்கி நடித்து திரையரங்குகளில் ரிலீசாகி இருந்தது ‘இட்லி’. இப்படத்தில் நித்யா மேனன், ராஜ் கிரண், கீதா கைலாசம், சத்யராஜ், இளவரசு, பார்த்திபன் மற்றும் ஷாலினி பாண்டே உள்ளிட்ட பலரும் இணைந்து நடித்திருந்தனர். ரசிகர்கள் இடையில் கலவையான விமர்சனங்களை பெற்ற ‘இட்லி கடை’ கடந்த 29 ஆம் தேதி நெட்பிளிக்ஸில் ரிலீஸ் செய்யப்பட்டுள்ளது. ஓடிடி வெளியீட்டிற்கு இப்படம் தற்போது ரசிகர்கள் இடையில் கவனம் ஈர்த்து வருகிறது. அதோடு சில அரசியல் கட்சி பிரமுகர்களும் ‘இட்லி கடை’ படத்தை பார்த்து விட்டு பாராட்டு தெரிவித்து கொண்டிருக்கின்றனர்.
துல்கர் சல்மான் தயாரிப்பில் கல்யாணி பிரியதர்ஷன் சூப்பர் ஹீரோவாக நடித்து திரையரங்குகளில் ரிலீசானது ‘லோகா சாப்டர் 1: சந்திரா. பிரேமலு புகழ் நஸ்லீன், சாண்டி மாஸ்டர் முக்கியமான ரோலில் நடித்து திரையரங்குகளில் வெளியான இப்படம் ரசிகர்கள் மத்தியில் அமோகமான வரவேற்பினை பெற்றது. பெண் கதாபாத்திரத்தை முன்னிலைப்படுத்தி ரிலீசான இப்படம் வியக்க வைக்கும் வசூல் சாதனையை படைத்தது. மலையாள திரையுலகில் அதிகம் வசூலித்த படம் என்ற பெருமையையும் பெற்றுள்ளது ‘லோகா’. இந்நிலையில் ரசிகர்கள் பெரும் எதிர்பார்த்த இப்படம் ஜியோ ஹாட்ஸ்டார் ஓடிடி தளத்தில் ரிலீஸ் செய்யப்பட்டுள்ளது.
கடந்த அக்டோபர் 2 ஆம் தேதி ரிஷப் ஷெட்டி இயக்கி நடித்து திரையரங்குகளில் ரிலீசாகி பெரும் ஹிட்டடித்தது ‘காந்தாரா சாப்டர் 1’. இப்படத்தில் ருக்மணி வசந்த், ஜெயராம், குல்சன் தேவய்யா முக்கியமான ரோலில் நடித்திருந்தனர். காந்தாரா நிலத்தில் வாழும் மக்களுக்கும், அரச குடும்பத்துக்கும் இடையில் நடக்கும் சம்பவங்களை அடிப்படையாக வைத்து பிரம்மாண்டமாக இந்தப் படத்தினை இயக்கியிருந்தார் ரிஷப் ஷெட்டி. பாக்ஸ் ஆபீஸில் ‘காந்தாரா சாப்டர்’ ரூ. 700 கோடிக்கும் அதிகமாக வசூலை குவித்து சாதனை படைத்திருந்தது. இந்நிலையில் அமேசான் ப்ரைம் வீடியோவில் இந்த வார ரிலீசாக இப்படம் வெளியாகியுள்ளது.
