‘பைசன்’ படத்தின் மூலம் ரசிகர்களின் கவனத்தை ஈர்த்த நடிகை அனுபமா பரமேஸ்வரன் கதையின் நாயகியாக நடித்திருக்கும் ‘லாக் டவுன்’ எனும் திரைப்படத்தின் வெளியீட்டு திகதி அதிகாரப்பூர்வமாக அறிவிக்கப்பட்டிருக்கிறது.
இயக்குநர் ஏ. ஆர். ஜீவா இயக்கத்தில் உருவாகி உள்ள ‘லாக் டவுன்’ எனும் திரைப்படத்தில் அனுபமா பரமேஸ்வரன் முதன்மையான கதாபாத்திரத்தில் நடித்திருக்கிறார்.
சக்திவேல் ஒளிப்பதிவு செய்திருக்கும் இந்த திரைப்படத்திற்கு என். ஆர். ரகுநந்தன் மற்றும் சித்தார்த் விபின் ஆகியோர் இணைந்து இசையமைத்திருக்கிறார்கள்.
கொரோனா தொற்று காலகட்டத்தில் அறிவிக்கப்பட்ட லாக்டவுன் பின்னணியில் உணர்வுபூர்வமான சம்பவங்களை ஒன்றிணைத்து உருவாக்கப்பட்டிருக்கும் இந்த திரைப்படத்தை லைகா புரொடக்ஷன்ஸ் நிறுவனம் சார்பில் பிரபலத் தயாரிப்பாளர் சுபாஷ்கரன் தயாரித்திருக்கிறார்.
பிரம்மாண்டமான பட்ஜட்டில் படங்களை தயாரித்த முன்னணி தயாரிப்பு நிறுவனமான லைகா புரொடக்ஷன்ஸ் நிறுவனத்தின் தயாரிப்பில் உருவாகி இருக்கும் இந்த திரைப்படம் எதிர்வரும் டிசம்பர் மாதம் ஐந்தாம் திகதியன்று வெளியாகும் என பிரத்யேக புகைப்படத்தை வெளியிட்டு படக்குழுவினர் தெரிவித்துள்ளனர்.
இதனிடையே எதிர்வரும் டிசம்பர் மாதம் ஐந்தாம் திகதியன்று பிரபல தயாரிப்பாளர் கே.ஈ. ஞானவேல் ராஜா தயாரிப்பில் கார்த்தி நடிப்பில் உருவாகும் ‘ வா வாத்தியார்’ எனும் திரைப்படம் வெளியிடப்படுவதாக அறிவிக்கப்பட்டது.ஆனால் படத்தின் பணிகள் நிறைவடையாததால் அந்த திகதியில் அனுபமா பரமேஸ்வரன் நடிப்பில் தயாரான ‘லாக் டவுன் ‘ வெளியாகிறது என திரையுலக வணிகர்கள் தெரிவித்திருக்கிறார்கள் என்பது குறிப்பிடத்தக்கது.
