மொன்றியல்-பியர் எலியட் ட்ரூடோ சர்வதேச விமான நிலையத்தில் (Montréal-Pierre Elliott Trudeau International Airport) செய்யப்பட்ட “உட்புற வண்ணம் பூசும் பணி” காரணமாக ஏற்பட்ட துர்நாற்றத்தை அடுத்து, அமெரிக்காவிற்கான விமானங்கள் ரத்து செய்யப்பட்டன.

அமெரிக்க சுங்கம் மற்றும் எல்லைப் பாதுகாப்பு (USCBP) பகுதியில் ஏற்பட்ட “கட்டுமானப் பொருட்களின் நாற்றம்” காரணமாகப் புதன்கிழமை காலையில் மொன்றியல் விமான நிலையத்திலிருந்து அமெரிக்கா செல்லவிருந்த விமானங்கள் ரத்து செய்யப்பட்டன.

துர்நாற்றத்திற்கான காரணம் “உட்புற வண்ணம் பூசும் பணியே” என்பதை மொன்றியல் விமான நிலைய அமைப்பின் (ADM) பேச்சாளர் ஒருவர் சிடிவி நியூஸுக்கு (CTV News) உறுதிப்படுத்தியுள்ளார்.

இருப்பினும், அமெரிக்க சுங்கம் மற்றும் எல்லைப் பாதுகாப்புப் பிரிவு தனது பணிகளைத் தற்காலிகமாக நிறுத்தி வைத்தது.

(பட உதவி: மொன்றியல் விமான நிலையத்தின் அமெரிக்க சுங்கப் பகுதியில் ஏற்பட்ட துர்நாற்றம் காரணமாக விமானங்கள் ரத்து செய்யப்பட்டன, ஜூலை 29, 2026 – பெட்ரோ கெரிடோ/சிடிவி நியூஸ்)

“இயல்பு நிலையை விரைவில் திரும்புவதற்கான அனைத்து முயற்சிகளும் மேற்கொள்ளப்பட்டு வருகின்றன. பயணிகள் விமான நிலையத்திற்குப் புறப்படுவதற்கு முன்னதாகத் தங்களின் விமானத்தின் நிலையைச் சம்மந்தப்பட்ட விமான நிறுவனத்திடம் சரிபார்த்துக் கொள்ளுமாறு கேட்டுக்கொள்ளப்படுகிறார்கள்” என்று எடிஎம் (ADM) தெரிவித்துள்ளது.

காலை 11:15 மணி நிலவரப்படி, அமெரிக்க சுங்கப் பிரிவின் பணிகள் படிப்படியாக இயல்பு நிலைக்குத் திரும்பி வருவதாக எடிஎம் தெரிவித்துள்ளது.

“வண்ணம் பூசும் பணியுடன் தொடர்புடைய வார்னிஷ் (Varnish) நாற்றம் காரணமாகவே இந்தத் தற்காலிக பணிநிறுத்தம் ஏற்பட்டது. இந்த நாற்றம் விரும்பத்தகாததாக இருந்தபோதிலும், இதனால் எந்தவித சுகாதார ஆபத்தும் ஏற்படவில்லை” என்று அது தெரிவித்துள்ளது.

வெளியேறுமாறு கேட்டுக்கொள்ளப்பட்ட பயணிகள்

போர்ட் லாடர்டேலுக்கு (Fort Lauderdale, Fla.) அதிகாலை விமானத்தில் ஏற முயன்ற ஆபிரகாம் வெக்ஸ்லர் (Abraham Wexler) என்பவர் CJAD 800 ஊடகத்திடம் கூறுகையில், இந்தச் சம்பவத்தைத் தொடர்ந்து பயணிகள் அனைவரும் அந்தப் பகுதியை விட்டு உடனடியாக வெளியேறுமாறு கேட்டுக்கொள்ளப்பட்டதாகத் தெரிவித்தார்.

“பாதுகாப்புப் பணியாளர்கள் தங்கள் கவுண்டர்களில் அமெரிக்க சுங்கத்துறை அதிகாரிகள் யாரும் இல்லை என்று கூறினர்,” என்று குறிப்பிட்ட அவர், சம்பவ இடத்தில் இரண்டு அல்லது மூன்று அவசர ஆம்புலன்ஸ்களைக் கண்டதாகவும் சேர்த்துக் கூறினார்.

எலி ஜேக்கப்சன் (Eli Jacobson) என்பவர் காலை 6:30 மணிக்கு விமான நிலையத்திற்கு வந்ததாகவும், லாஸ் வேகாஸிற்கான (Las Vegas) தனது விமானம் அடுத்த நாள் வரை தாமதப்படுத்தப்பட்டுள்ளதை அறிந்ததாகவும் கூறினார்.

“எந்தவொரு நகர்வும் இருக்கவில்லை. முதலுதவி மருத்துவ ஊழியர்களும் தீயணைப்பு வீரர்களும் உள்ளே செல்வதை நாங்கள் கண்டோம். அவர்கள் எங்களை வெளியேறுமாறு கூறினர், மேலும் அமெரிக்காவிற்கான அனைத்து விமானங்களையும் ரத்து செய்தனர்” என்று அவர் சிடிவி நியூஸிடம் தெரிவித்தார்.

மார்கரெட் புசாத் (Margaret Busath) என்பவர், அடுத்த சில மணிநேரங்களில் தங்களால் பறக்க முடியுமா இல்லையா என்பதற்கான பதிலுக்காகத் தனது குடும்பத்தினர் இன்னும் காத்திருப்பதாகக் குறிப்பிட்டார்.

“அங்கு அதிக தகவல்கள் வழக்கப்பட்டிருக்கவில்லை. பின்னர் அவர்கள் எங்களை வெளியேறுமாறும், அமெரிக்க சுங்கப்பிரிவு தற்காலிகமாக மூடப்பட்டுள்ளதாகவும் கூறினர்,” என்று அவர் கூறினார்.

சமூக வலைத்தள கேலிகள்

இந்தச் சம்பவம் சமூக வலைத்தளங்களில் பலரையும் ‘மைக் செஸ் ரோனா’ (Mike chez RONA) தொடர்பான நகைச்சுவைகளைச் செய்ய வைத்தது. வண்ணம் பூசும்போது விசிறிகளை வாங்குமாறு ஊக்குவிக்கும் அந்த நிறுவனத்தின் நகைச்சுவைப் பாடலை அவர்கள் மேற்கோள் காட்டினர்.

“இங்கு ஒரு ஹார்ட்வேர் கடை போல மணக்கிறது” என்று ஒரு பயனர் வேடிக்கையாகப் பதிவிட்டுள்ளார்.

“மைக் எங்கே?” என்று மற்றொருவர் கேள்வியெழுப்பியுள்ளார்.

(பட உதவி: துர்நாற்றம் காரணமாக விமானங்கள் ரத்து செய்யப்பட்டதை அடுத்து மொன்றியல் விமான நிலைய ஊழியர்கள் குடிநீர் பாட்டில்களை விநியோகிக்கின்றனர் – ஒலிவியா ஓ’மாலி/சிடிவி நியூஸ்)

அமெரிக்க முன்கூட்டிய சுங்கச் சோதனை (U.S. preclearance) நடவடிக்கைகள் குறித்த சந்தேகங்கள் உள்ள எவரும் நேரடியாக அமெரிக்க சுங்கம் மற்றும் எல்லைப் பாதுகாப்புப் பிரிவைத் தொடர்புகொள்ளுமாறு கேட்டுக்கொள்ளப்படுகிறார்கள்.